Ratiga dambe kan hore saanqaadkiisa ayuu leeyahay (isbadalada bulsho ee dadkeena)

Miyiga ama tuulada ayuu ka imaan jirey isaga oo magaalada iyo dadkeedu qiime weyn la leeyihiin, una arka inay wax dheeryihiin, diyaarna u ah siduu magaalada u fahmi lahaa, una yeelan lahaa dhaqankeeda, muuqaalkeeda iyo afkeeda.

Dadka magaalada dagan laftoodu qofkaas waxay ula dhaqmi jireen sidii qof tababar ku jira, inta badan dadka waaweyn waxay ahaayeen dad yaqaan dhaqanka miyiga laakiin dhalinyarada magaalada ku dhalatay ama ku caqlisatay ninkaas cusubi wuxuu u ahaa kunjeerto ay ka maadsadaan ama ka riwaayaaystaan.

Si kastaba ha ahaatee dadka oo dhan ninkaas waxay diyaar ula yihiin inay wax u sheegaan oo ilbixiyaan, isaguna wuxuu diyaar u yahay inuu badalo hab-fakarkiisa iyo dhaqankiisa oo uu reer magaalaha dhinac walba uga ekaado. Si uu reer magaal u noqdana waa inuu galo iskool ama biribaati ama seeraale, waana inuu joornaalka akhriyo, baararkana fariisto, dhar fiicana xirto, sida reer magaalkana u xiirto. Natiijada arrintaas ka dhalatana waxay ahayd in bulshadu dhinacaas isu raacdo oo nin walba oo reer miyi ah ama jaahil ah ku daydo reer magaalka ama aqoonyahanka. Taa macneheedu maaha in reer magaalku dhinac walba kaga wanaagsanaayeen reer miyiga ee waxaan muujinaynaa siday la ahayd wiilka ama gabadha magaalada usoo wareega. Dhinac kalena waa jirtay in reer miyigu hoos u eegayeen dadka reer magaalka ah oo aan aqoon dhaqanka miyiga.

Hadda maxaa is badalay?

Magaalooyinkii waxaa u batay dad miyiga toos uga soo hayaamay ama jabhadnimo soo maray oo reer magaalkii barabixiyey. Dadkaasi waxay muquuniyeen dadkii reer magaalka ahaa; waayo tiro iyo awoodba way ka bateen, taasna waxay keentay in dadkii magaalada daganaa iyo kuwii miyiga kasoo galayba iyaga ku daydaan oo la qaato hab-fakarkooda, hab-dhaqankooda, muuqaalkooda, lahjadahooda iwm.

Sababtu wax kale maaha ee aadanuhu hadba ciddii awood leh ayay raacaan, awooddii magaaladana raggaas ayay gacanta u gashay, nin aan ka mid noqon ama isu-ekaysiina shaah ka cabbi maayo. Kolka waa inaad qori gadatid, oo qaadka cuntid, oo koox hubaysan ku biirtid ama qabiilkaaga ku meelmartid, oo aad samaysid falal laga argagaxo si hadda ka dib cadkaaga luguugu ogolaado ama atoorayaasha kale kaaga leexdaan. Waa inaad kala baratid dadka la baadi karo iyo kuwa laga warwareegayo. Kolkaas ayaa dadkii magaalooyinka daganaa u bateen dad dhaqan cusub wata oo labadii dhaqan ee miyiga magaaladaba ka tagey!.

Way socotaa ....