Ninkii wuxuu yiri meeshaan waxaan u nimid in aan wax ka barto, sahay yar baana wataa, cid kaloo wax isiinaysana ma jirto. Haddaba khubustaas ayaan ku joogaynaa ilaa dantaydu iiga dhamaanayso. Sababta uu guriga ugu xirayna waa inuu ka celiyo xaafadaha soomaalida ee ay aadayso ama looga imaanayo.
Ninkii wuxuu na weydiiyey soo nabigu scw ma oran naagtu gurigeeda kama bixi karto itadoon ninkeeda idan ka haysan?. Tan kale soo Ilaahay ma oran: ninka hodonka ah intii awoodiisa ah (xaaskiisa) ha nafaqeeyo, ninka ciriiriga dhaqaale qabana intii Alle siiyey ha ku nafaqeeyo?.
Ninkaan diinta wuxuu ka xafidsan yahay inta isaga xuquuqdiisa ka hadlaysa laakiin inta sheegaysa xuquuqda isaga lugu leeyahay waa moogyahay ama waa ismoogaysiinayaa.
Waadi cadaabeed bay leeyihiin kuwa beegga iyo miisaanka fududeeya oo markay soo beeganayaan ka oofsada, kolkay u beegayaan ama miisaamayaana ka dhima.
Dadku uma baahna in lugu wacdiyo oo lugu dhiirrigaliyo raadsiga xuquuqdooda gaarka ah ee waxay u baahan yihiin in lugu waaniyo cafis iyo tanaasul; waayo dabci bay u tahay inay woxooda gaarka ah doontaan oo waliba ku dagaalamaan ama isku dayaan inay ka badan qaataan laakiin waxa Alle ka baqa iyo wacdiga u baahani waa inaad ka tanaasushid xaqaaga wax ka mid ah iyo inaad iska bixisid xuquuqda lugugu leeyahay.
Qur'aanku wuxuu ka hadlay qolo munaafiqiin ah oo diidaysa haddii loogu yeero Alle iyo Rasuul inay kala xukumaan laakiin hadday garta helayaan u imaanaya iyagoo hoggaansan!.
Waxaa xusid mudan in xuquuqda caamka ah ee ummadda ka dhaxaysa ay u baahantahay in raadinteeda iyo difaaceeda dadka lugu wacdiyo oo lugu dhiirrigaliyo; waayo inay isku halayn darteed u dayacanto ayaa dhici karta ama ninkaan dan gaar ah ugu jirinba ka dhuunto.
Waxaa kale oo dhici kara xilliyada dadku gumoobaan oo ay qaayibaan dullinimada iyo in la dulmiyo in loo baahdo in dadka lugu riixo raadsiga iyo dalbashada xuquuqdooda qof ahaaneed; waayo dhiirrasho la'aan iyo cabsi ay caadaysteen baa ka hortaagan.
Diintu waa wada xaq, axkaamteeduna waa wada caddaalad, mana la ogola in qayb la qaato, qaybna laga tago ee aynu diinta Alle u xukuntano, kuna qanacno, una hoggaansano; waayo ninkii diinta qeyb yeela, qeybna diida hoog adduun iyo khasaare aakhiro ayaa isugu darmanaya. Dhinaca kale yaynaan la mid noqon munaafiqiinta Qur'aanku ka waramay iyo garsoorihii eexda xukumay ee yiri: la jiifiyaana bannaan.
Comments
Post a Comment