Islaamku siyaabo kala duwan ayuu dadka ugu boorriyey guurka, waxaana ka mida:
1. Wuxuu sheegay inuu guurku ka mid yahay dhaqankii (sunnadii) rushusha. Alle wuxuu yiri: “ waxaan hortaa soo dirnay rusul, waxaana u samaynay xaasas iyo ubad”.
Bukhaari iyo Muslim waxay ka wariyeen Anas inuu yiri: seddex nin baa yimid guryihii nabiga صلى الله عليه وسلم iyagoo weydiinaya cibaadada nabiga, markii loo sheegay ayay yaraysteen, waxayna dheheen annagu xaggee ka joognaa nabiga, isaga dambigiisii hore iyo dambigiisii dambeba waa loo dhaafaye. Midkood wuxuu yiri: anigu habeenkii ayaan tukanayaa waligey, midna wuxuu yiri: anigu samankoo dhan waan soomayaa mana afurayo, midna wuxuu yiri: aniguna naagaha ayaan isaga dheeraanayaa oo waligay ma guursanayo.
Nabiga ayaa u yimid oo ku yiri: “ma idinkaa kuwa sidaa iyo sidaa yiri?. Wallaahi aniga ayaa idiinku Alle ka cabsi badan, idiinkuna taqwo badan, laakiin waan soomayaa waana afurayaa, waa tukanayaa waana seexanayaa, dumarkana waan guursanayaa ee ninkii sunnadayda naca iga mid maaha”.
Bukhaari ayaa ka wariyey Cabdullaahi ibnu Jubayr in Cabdullaahi Ibnu cabbaas ku yiri: ma guursatay?. Waxaan iri: maya. Wuxuu yiri: guurso; waayo ummaddaan waxaa u khayr badnaa ciddii ugu naago badnayde. Wuxuu Ibnu Cabbaas ula jeedaa nabiga عليه الصلاة والسلام. Imaamu Axmadna wuxuu yiri: doobnimadu arinta islaamnimada meelna kagama jirto. Wuxuu kaloo yiri: qofkii kuugu yeera guur la’aan wuxuu kuugu yeeray wax aan islaamka ahayn.
Waxaan aad ula yaabay sida uu isu waafaqay hadalka Imaamu Axmad iyo sheekada habraha Soomaaliyeed ee ahayd “ qofkii meher la’aan dhinta waa laga dayrinayey!”.
Waxaa kale oo yaab leh sida dad badan oo guurka baahi weyn u qaba, awoodna u leh aysan u guursan iyaga oo aanay jirin wax ka hortaagan. Waxaan soo xusuustay Sayid Cumar oo ku yiri: Abu-azzawaa’id: “guurka kuuma diidana waxaan ahayn CAJSI ama FUJUUR”. Bal dhalinyarada faraha badan ee tilmaantaan leh dib ha isugu noqdeen wiilal iyo gabdhaba.
2. Mar kale Ilaahay wuxuu inagu galladaystay inuu ina siiyey xaasas iyo ubad ka farcamay, wuxuuna yiri: “ Ilaahay wuxuu naftiina idiinka sameeyey xaasas, xaasaskiinana wuxuu idinka siiyey wiilal iyo kuwo ay sii dhaleen, risiq wanaagsana wuu idin siiyey”.
3. Mar kale islaamku amar toos ah ayuu ku bixinayaa guurka. Ilaahay wuxuu yiri: “guursada wixii idiin wanaagsanaada oo dumar ah”. Nabiguصلى الله عليه وسلم wuxuu yiri: “dhalinyarooy ha guursado ninkii idinka mid ah ee kara culayska guurka (ninimo ahaan iyo dhaqaale ahaan); waayo isagaa indhahaa laabi og, farjigana dhawri og”. Ilaahay wuxuu yiri: “ u guuriya kuwa reer laawayaasha ah ee idinka midka ah iyo kuwa wanwanaagsan ee addoomadiina ah (rag iyo dumar).
4. Mar kale islaamku wuxuu sheegaa faa’iidooyinka guurka si uu dadka ugu boorriyo, waxaana ka mida: ajarka laga helayo, ubadka ka dhalanaya, xasiloonida iyo daganaanshaha, naxariista iyo kalgacaylka iwm.
Comments
Post a Comment