Sheekhu waa ninka diinta barta oo si
dhab ah u fahma, naftiisana ku dhaqa, dadkana si xikmad leh u gaarsiiya.
Ninkaas Ilaahay wuxuu siiyaa magac iyo maamuus, dadka quluubtoodana wuxuu u
galiyaa kalsooni iyo kalgacayl.
Kalsoonida iyo kalgacaylka loo hayo
sheekha wuxuu keenaa in la jeclaado oo lugu kalsoonaado, korna loo eego cid
kasta oo sheekha xiriir la leh, sida ilmihiisa, qaraabadiisa, xertiisa iwm,
waxaana laga fishaa ciddaas fiicnaan iyo khayr maadaama ay sheekhii ku
xirantahay.
Sheekhu meekhaankaan hal mar iskama
gaarin ee waddo dheer ayuu u soo maray. In sidaa loo aamino oo loo jeclaadana
waxay ka dhalatay sifooyin wanaagsan oo lugu bartay iyo waxqabad fiican oo lugu
arkay.
Nin kasta oo cilmi barta waxaa sugaya
dariiqaa dheer ee sheekhu u soo maray ictiraafka iyo horraysiinta dadweynaha.
Waxaa sidaas ka duwan oo aan marayn dariiqaas dheer ilmaha sheekhu dhalay oo
iyagu ka faa'iidaysta sumcadii iyo kalsoonidii aabbohood loo hayey.
Haddaba hadday arrintu sidaa tahay
sheekha waxaa la gudboon inuu ilmihiisa u diyaariyo inay sheekhnimada ka
dhaxlaan oo uu diinta si wacan u baro, si wanaagsana ugu tarbiyeeyo, isla
markaasna uu dareensiiyo, kuna tababaro xilka dacwada iyo faafinta diinta; si
uu xilka uga la wareego isaga oo u tababaran.
Dhinaca kalena waxaa la gudboon
ilmaha sheekhu dhalay wiilal iyo gabdhaba inay yaraantaba ugu diyaargaroobaan
siday xilkaas ula wareegi lahaayeen iyagoo u qalma. Waxaa kale oo muhiim ah
inay gaadaan in dadweynuhu khayr ka filanayo oo meel sare laga eegayo; sidaa
darteed ay ka feejignaadaan inay noqdaan dad liita aqoon ahaan ama dhaqan ahaan
ama xilkasnimo ahaan oo aysan ummadda khayrka ka filanaysa ku hungoobin.
Sheekhyadeena iyo ilmohooda
Koox arday
ah oo jaamacado dhigta ayaan la kulmay. Waxaa ka mid ahaa labo uu dhalay nin
sheekha ah. Waxaan weydiiyey waxa ay bartaan, mise midna diin ma barto. Waxaan
kale oo weydiiyey walaalohood magaalo kale wax ka barta, mise mid diin barta
kuma jiro. Waxaan ku iri ma garbaa idinka oo ilma sheikh ah in aan midkiina
diinta baran?.
Dabadeed
Sheekhii ayaan arkay oo arrintii kala hadlay, waxaana xusuusiyey in nabi
Zakariyaa uu Ilaahay ka baryay wiil diinta iyo nabinimada ka dhaxla iyo in nin
sheikh ah uu qoray kitaab uu u baxshay “Isdhaxalsiinta dacwada” oo uu kaga
hadlayo sida sheekhu aqoonta diinta iyo masuuliyadeeda uu ugu diyaarin lahaa
ubadkiisa. Sheekhii wuxuu ii sheegay in uu masuuliyadaas hadda rag u
diyaarinayo. Culimo kale oo carruurtoodii cilmi adduunyo ku wada mashquuleen
ayaan isla su’aashaas weydiiyey. Mindhaa rag badan maba ay ku baraarugin inay
diyaariyaan ciddii cilmiga iyo dacwada ka dhaxli lahayd.
Dabcan
diintu waa naxariis iyo fadli Ilaahay oo ummadda oo dhan loo soo dajiyey, nina
nin kama xigo oo nin walba wuxuu ka qaadanayaa intii uu dadaalo, dadka culimada
waaweyn noqdayna culimo ma wada dhalin, kuwa culimadu dhaaleena culimo ma wada
noqon.
Gabagabadii
waxaan xusuusinayaa dhammaan carruurta ay dhaleen culimada, ducaadda,
macallimiinta iyo dadka ehlu-khayrka ah inay u diyaargaroobaan siday
waalidiintood uga dhaxli lahaayeen cilmiga, dacwada iyo qaadista masuuliyada
diinta, ayna u buuxin lahaayeen kaalintii waalidiintood, culimadana waxaan ku
boorrinayaa inay isu xilqaamaan siday ilmohooda u dhaxalsiin lahaayeen cilmiga
iyo dacwada.
Comments
Post a Comment