Illaa Maraykankana waa lagu dhintaa!
Caawa ayaan kulanay Sheekh Maxamed Idriis oo xalay ka yimid Maraykanka. Warbixintii ayuu ku daray usbuucaan ilaa shan qof oo Soomaali ah baan xabaalnay. Wuxuu sii raaciyey dalka waa la dagay oo qabuuro badan baan ku leenahay. Wuxuu sheegay shanta qof in labo shil gaari ku dhimatay, seddexda kalena ay jirrooyin kala duwan sababsadeen.
Waxaa markiiba miskaxdayda ku soo dagdagtay dadka Maraykan iyo meelaha la mida u dhoofaya in aysan miskaxdooda ku soo dhicin inay meesha ku dhiman doonaan markay baadigoobka ugu jireen dhoofka. Miskaxdu way sii taraaraxday oo waxay meesha soo dhigtay dadka dhoofay badankoodu inay filayeen maalinta ay dhulkaas cagaha dhalaan inay ugu dambayso busaarad, jirro iyo dhibaato adduun oo dhan.
Waxaa dhab ah in xaqiiqadu sidaas ka duwanaatay oo meesha loogu tagay geeri qabri la'aan ah!; waayo qabriga hal qof lagu xabaalo wuxuu kuugu fadhiyaa lacag u dhaxaysa seddex kun ilaa shan kun oo dollar!. Waxaan ogaaday meesha in dadka xabbad lagu laayo oo Soomaali badan toogasho lagu laayay haba u badnaadeen taksiilayaale. Waxaa kale oo sugnaatay in dadka qaarkood meesha ku waasheen, kuwana buufis ku dhacay, kuwana jirrooyin khatar ah ku habsadeen, sida: kansar iwm.
Waxaa taa ka yaab badan in meesha dad badani faqri weyn kala kulmeen halka kuwo kalena ay dhibaato aan la soo koobi karin kaga timid xagga xaasaskii oo colaad aan dhamaad lahayn dhexgashay oo rag badan dumarku guryaha ka eryeen. Kaaga darane ubadkii aad uba dhooftay yaanay gaajo arag ayaa dad farabadan laga faramaroojiyey indhohooda oo shan ah!.
Kolkaan hoygii aan daganaa ku soo noqday ayaa sheekh C/qani Awsaalax oo Internet-ka ku jirey wuxuu akhriyey diraasad ka hadlaysa khatarta guumaysnimada ee ku habsatay dalalka khaliijka, hadalkii ayuu sii waday oo wuxuu sheegay inay diraasadu sheegtay in dalalka khaliijka afartii ilmood ee u dhashaba seddex hablo tahay. Kaaga sii darane dalka Sucuudiga kaligi sanad walba waxaa shilalka gawaarida ku dhinta toban kun oo wiil. Taas oo kordhinaysa faraqa u dhexeeya tirada wiilasha iyo tan gabdhaha. Tan kale diraasadu waxay sheegtay in sanadkii 2010 ay dalka sucuudiga u joogtay hal milyan iyo bar hablood oo guumayso ah. Waxaa iyana is weydiin leh inta la soo furay oo iyana guryaha dhooban!.
Aniga oo ka yaaban dhibaatooyinka faraha badan ee ka taagan dhulalkii dadkeenu u qabeen in dhib oo dhan lagaga baxayo ayaan xusuustay inay meeshu adduunyo tahay!. Waxaana gartay in loo baahanyahay in aad ummadda loo xusuusiyo inay meeshu adduunyo tahay!.
Comments
Post a Comment