Dadku waxay kala leeyihiin midabo, muuqaalo, mabaadi’ iyo
mawaaqif lagu kala sooco. Nin walbana waxaa la gartaa waxa uu xambaarsan yahay
ee ah diin, dhaqan, afkaar iwm, halkaas ayaana loogu soo hagaagaa laakiin waxaa
jira dad aan lahayn midab iyo dhadhan loogu soo hagaago midna ee maalin walba xidha
shaatiga suuqa yaal ama nin walba la qaata midabka iyo muuqaalka uu leeyahay
sida jirjirroolihii.
Tilmaanta noocaan ah waxay tusisaa xumaan iyo liidnimo qarsoon
oo lagu dado hadba dahaarkii ama daboolkii la is leeyahay kanaa qarin kara.
Xumaantaas waxay noqon kadhaa tan u liidata oo ah munaafiqnimo oo ah inuu qofku
mabda’ gaalnimo ah qalbiga ku haysto, islaamnimana muujisto. Waxay kale oo
noqon kadhaa shakhsiyad xumo ku keenaysa inuu cid walba u nacamleeyo ama waxay
noqon kadhaa hunguri aan wax xukumi kara jirin wuxuu liqayo maahee ama
fulaynimo naftu ka bixi rabto oo meeshii mawd ama asbaabtiisu ka dhawdahayba uu
nacam iyo isu ekeysiin isaga gudbayo.
Hooyo Soomaaliyeed la weydiiyey da’da ninka gabadheeda guursaday
waxay ku jawaabtay: eeddo waa noocaas maaska ah!. Waxay ka wadaa waa gar
maleyte malaasan oo wada siman sida haraga maaska ah, una muuqda inuu da’ walba
la fil yahay!.
Ninkaan waxa soddohdi ku sheegayso isagu eed kuma laha oo
waa abuur Ilaahay laakiin waxaa jira rag badan oo xagga mabaadi’da iyo afkaarta
maas ka ah oo la moodo inuu qolo walba la diin yahay ama la tol yahay!.
Ninka maaska ah haddii uu munaafiqnimo ka badbaado oo
hunguri xumo iyo fulaynimo ka fakado waxaanu ka fakanayn inuu yahay nin
shakhsiyad liita oo xataa haddii uu niyad ahaan fiicanyahay aan wax weyn lagu
halaysan karin; waayo ninka qoladii uu la kulmaba NACAM oranaya ma aha nin
isbadal iyo horumar keeni kara ama xaq meel marin kara ama baadil hor istaagi
kara ee ragow jirjirroolaha garna-maxajiyaha ah yaan lagu dagmin, isaguna ha
isdabaqabto.
Axmed C/samad
alwaqaar@hotmail.com
Comments
Post a Comment