Nin walaalki cadow u maleeyey oo diley!

Goobaha colaaddu ka taagantahay nin walba digtooni ayuu ku joogaa gaar ahaan habeenkii iyo xilliyada la isu soo dhuuman karo; sidaa darteed waardiye ayaa la iska qabtaa laakiin ragga cabsanaya hadday tiro yar yihiin ama ay joogaan meel aan cadowgu ku ogayn iyaga oo digtooni qaba ayay waardiye la'aan seexdaan. Kolkaas waxaa dhacda in nin ragga ka mid ah kaadi u koco iyada oo ragga kale hurdaan. Mararka qaarkood waxaa dhacda marka ninkaasi dib usoo laabto in raggii klale nin ka mid ah uu ku tooso sharqantiisa oo uu u qaato cadow dalaq usoo yiri, ka dibna uu xabbadda kala hormaro oo meesha ku dilo!.

Arrinta noocaan oo kale ah aad bay u naxdin iyo xanuun badantahay. Ninka falkaas sameeyey, ciidanka la socda iyo dadkay ka dhasheena uur-kutaallo ayay ku noqotaa; waayo wuxuu gacantiisa isaga dilay walaalkiis oo u ahaa garab iyo gaashaan oo arrintu waa kaa dhimay oo kugu dhimay. Wuxuu waayayaa hiilkii iyo waxqabadkii uu ku qabey, dhinac kalena waxaa kusoo fakanaya culayskii uu kaga aadanaa oo ubad iyo maatiba lahaa.

Si kastaba ha ahaatee ninkaas waxaa hoday ismoodsiis aan xaqiiqo ahayn oo walaalki uu ugu muuqday cadow isaga dilaya, isaga oo ismoodsiiskaas ka ambaqaadayana uu go'aansaday inuu walaalki dilo isaga oo is leh cadow ku dili lahaa ayaad dishay. Sida aan sheegnayna naxdin, murugo iyo gocosho xanuun badan buu ninkaasi ku abaadaa, mana dhacdo inuu shilkaas u fahmo guul usoo hoyatay ama amaan iyo wax lagu faano.

Gabagabadii akhristow ninka gafkaas ka dhacay waxuun garowshiiyo ah ayuu leeyahay maadaama uu walaalki cadow u qaatay, falkiina uu ka shallaayayo laakiin muxuu kula yahay ninka walaalki sidaa ismoodsiiska ah u dilay, ka dibna ku farxay oo u arkay inuu guul soo hoyiyey, raggana ugu faanay inuu walaalki gacantiisa ku dilay!. Ninkaas waxaa la mid ah ninka walaalihiis muslimiin ah u qaatay cadow oo sidaas ismoodsiiska ah ku laayay, ka dibna ku farxay, kuna faanay inuu walaalihiis laayey!. Haddaba ragga dagaalada qabyaaladeed gala ama abaabula in yar ha fakareen oo ha is weydiiyeen dadka ay laayeen cidda ay yihiin, cidda ay ka dhinteen iyo cidda ka faa'iidaysa dilkooda.